МВФ падтрымаў беларускую дыктатуру яшчэ на 1 мільярд даляраў

Міжнародны валютны фонд павялічыў аб'ёмы «антыкрызіснага» крэдытавання эканомікі Беларусі.

Рада дырэктараў Міжнароднага валютнага фонду (МВФ) у панядзелак прыняла рашэнне павялічыць аб'ём крэдытнай праграмы stand-by для Беларусі да $3,52 млрд, гэта значыць прыкладна на $1 млрд, а таксама ўхваліла неадкладнае вылучэнне Менску чарговага, другога транша на суму $679,2 млн., паведамляе РБК.

Новы крэдыт павінен падтрымаць эканамічную праграму ўрада Беларусі, змякчыўшы больш моцныя, чым раней чакалася, наступствы для краіны сусветнага фінансавага крызісу, кажацца ў паведамленні МВФ.

Першапачаткова крэдытная лінія для Беларусі была адкрытая ў студзені ў аб'ёме $2,51 млрд, тады ж Менску быў пададзены першы траншаў крэдыту.

Узгодненая з МВФ праграма прадугледжвае, што ўрад Беларусі захавае, нягледзячы на зніжэнне паступленняў, збалансаваны бюджэт у 2009 годзе, ён таксама будзе захоўваць адэкватна жорсткую грашова-крэдытную палітыку, забяспечыць большую гнуткасць абменнага курсу ў межах калідора плюс-мінус 10%, паглыбіць структурныя рэформы.

Намеснік дырэктара-распарадчыка МВФ Такатошы Ката сказаў, што ўзгодненая праграма прадугледжвае актывізацыю крокаў па лібералізацыі эканомікі і падрыхтоўцы прыватызацыі з мэтай умацавання перспектываў эканамічнага росту ў сярэднетэрміновай перспектыве.

У прыватнасці, прадугледжваецца прыняццё новага прыватызацыйнага заканадаўства і стварэнне прыватызацыйнага агенцтва для рэалізацыі «амбіцыйнай» праграмы ў гэтай сферы.

Узмацненне жорсткасці грашова-крэдытнай палітыкі падвысіць прывабнасць укладанняў у беларускіх рублях, прышчэпіць давер да нацвалюты і ўмацуе давер да ЦБ, лічыць ён. На яго думку, важна захоўваць жорсткую крэдытна-грашовую палітыку і пазбягаць празмернага павелічэння крэдыту эканоміцы.

Ката таксама адзначыў, што ў межах узгодненых структурных мераў мяркуецца падвысіць незалежнасць ЦБ, скараціць рэгуляванне коштаў і зарплатаў, адмяніць абавязковыя планы па вытворчасці і занятасці для прыватных кампаніяў.

Нацбанк Беларусі ў чэрвені падвысіў базавыя стаўкі па даванні ліквіднасці банкаў з 20% да 22% гадавых, рэкамендаваў камерцыйным банкам падвысіць стаўкі па рублёвых дэпазітах фізычных асобаў, пашырыў прагнозны калідор ваганняў курсу беларускага рубля да кошыка валютаў з +/- 5% да +/- 10%.