Максім Вінярскі: Рэзервацыі патрэбныя для дармаедаў з Драздоў

Можа там яны пачнуць прыносіць карысць.

Cкандальную заяву «палатачнікаў» аб стварэнні рэзервацый для «дармаедаў» сайту Сharter97.org пракаментаваў каардынатар грамадзянскай кампаніі «Еўрапейская Беларусь» Максім Вінярскі:

- Гэта сведчыць пра тое, што нашы прызначэнцы зусім адарваліся ад рэальнасці. Як у тым савецкім анекдоце: «Леанід Ільіч, а вы іх дустам не спрабавалі?» «Дэпутаты» жывуць у паралельнай рэальнасці і не разумеюць, што такія меры толькі павялічваюць незадаволенасць уладамі. Пратэстныя настроі будуць расці, людзі, якіх практычна не лічаць за такіх, будуць бараніць свае асноўныя правы.

- Нядаўна прагучала заявы, што «дармаедаў» пачнуць вышукваць з дапамогай ID-карты. Што яшчэ могуць прыдумаць беларускія ўлады?

- Ад нашых чыноўнікаў можна чакаць чаго заўгодна. Не ў гэтым справа. Трэба разабрацца чаму людзі не могуць знайсці годную працу, а потым думаць, што рабіць з беспрацоўнымі. І наогул, гэта не тыя метады.

У рэжыму ўсё менш грошай, з гэтай прычыны ў галаву прыходзяць такія вар'яцкія ідэі. Рэзервацыі і гета - месцы, якія запаўняліся трэцяй, чацвёртай і пятай катэгорыямі людзей. Гэтыя людзі зусім не атаясамліваюць сябе з народам. На вялікі рахунак, рэзервацыі патрэбныя для дармаедаў з Драздоў. Можа там яны пачнуць прыносіць карысць.