Сваякі беларускіх палітвязняў выступілі ў абарону «Хартыі-97»

12.02.2018, 12:51
17,716

Незалежны сайт набліжаў вызваленне тых, хто знаходзіўся ў няволі.

Абаронім «Хартыю-97» разам

Два тыдні таму беларускія ўлады заблакавалі доступ да найбуйнейшага і ўплывовага беларускага незалежнага сайту сharter97.org.

Мы, сваякі беларускіх палітвязняў розных гадоў, лепш, чым хто-небудзь ведаем, наколькі важныя словы праўды ў задушлівай атмасферы замоўчвання і хлусні. Наколькі важнае святло надзеі ў цемры несвабоды.

Калектыў «Хартыі-97» заўсёды падтрымліваў нас і нашых блізкіх, не даваў беларускаму грамадству забыцца пра тых, хто і ў няволі змагаўся за «права людзьмі звацца», набліжаючы тым самым іх вызваленне. Мы гэта памятаем і заўсёды будзем ўдзячнымі за гэта.

Блакаванне «Хартыі-97» і наступ на іншыя незалежныя СМІ - яскравае сведчанне таго, што ўлады спрабуюць атрымаць поўны кантроль над інфармацыйным полем Беларусі, а значыць і над нашымі думкамі.

Мы ўпэўненыя, што гэта немагчыма.

Мы выказваем сваю салідарнасць з калектывам Сharter97.org. Мы звяртаемся да незалежных журналістаў і чытачоў «Хартыі-97» з просьбай пастаянна публікаваць на сваіх сайтах і старонках у сацыяльных сетках спосабы абыходу блакавання.

Мы спадзяемся і верым, што з нашай дапамогай сharter97.org зможа не толькі захаваць сваю аўдыторыю, але і пашырыць яе.

Трымайцеся, сябры! Мы з вамі!

Сваякі беларускіх палітвязняў розных гадоў:

Марына Адамовіч

Валянціна Аліневіч

Марына Шыбко

Мілана Міхалевіч

Валянціна Дзядок

Алена Міхалевіч

Таццяна Севярынец

Галіна Сіўчык

Людміла Мірзаянава