Міністр інфармацыі Карлюкевіч прызнаўся, што таемна чытае «Хартыю-97»
26- 28.02.2018, 16:15
- 31,627
ФОТА: БЕЛТА
Чыноўнік адзначыў, што незалежны сайт застаецца верным самому сабе.
Міністр інфармацыі Аляксандр Карлюкевіч быў адным з тых, хто адкрываў штогадовую Менскую кніжную выставу.
«Наша Нiва» запыталася ў чыноўніка, што можа зрабіць «Хартыя-97», каб зноў быць даступнай у Беларусі? У студзені Міністэрства інфармацыі абмежавала доступ да незалежнага парталу на тэрыторыі Беларусі.
«Я не чытач «Хартыі-97» апошнім часам, хоць у адпаведнасці з законам маю такую магчымасць як прадстаўнік Міністэрства інфармацыі. Безумоўна, мы будзем глядзець на далейшыя матэрыялы гэтага інтэрнэт-рэсурсу. Гэта вельмі небяспечна - нешта планаваць і падказваць. «Пішыце так, альбо пішыце інакш...» Відаць, «Хартыя» застанецца «Хартыяй», а нашы дзеянні застануцца нашымі дзеяннямі і нашым бачаннем дзяржаўнай пазіцыі», - сказаў Карлюкевіч.
Сёння галоўная рэдактарка Charter97.org Наталля Радзіна заклікала дэпутатаў Еўрапарламента ўвесці санкцыі супраць міністра інфармацыі Аляксандра Карлюкевіча, намесніка міністра інфармацыі Ігара Луцкага (цяпер займае пасаду генеральнага дырэктара тэлеканала «Сталічная тэлевізія») і начальніка Аператыўна-аналітычнага цэнтра пры адміністрацыі Лукашэнкі Андрэя Паўлючэнкі, адказных за прыняцце пастановы аб блакаванні Charter97.org.
Таксама галоўная рэдактарка «Хартыі» заклікае ўвесці санкцыі супраць лукашэнкаўскага Парку высокіх тэхналогій датуль, пакуль не спыніцца ціск на незалежныя медыі ў Беларусі.
Нагадаем, што 24 студзеня рэжым Лукашэнкі заблакаваў незалежны інфармацыйны рэсурс Charter97.org. Блакаванне пацвердзіў першы намеснік міністра інфармацыі Ігар Луцкі. Міністэрства інфармацыі ўзначальвае Аляксандр Карлюкевіч.
Абысці блакаванне можна і вось інструкцыі:
- Самы просты спосаб чытаць «Хартыю'97»
- Як абысці блакаванне сайта «Хартыя-97»
- Як абысці блакаванне сайта на Android і iOS
