Прышчэпкі ад COVID-19 дзецям: адказы на самыя актуальныя пытанні

У Беларусі прышчэпліваюць 12-17-гадовых.

Пра гэта «Минск-Новости» паведаміла галоўная лекарка 34-й цэнтральнай раённай клінічнай паліклінікі Савецкага раёна Менска Наталля Дзяргач.

— І раней, і зараз аб важнасці вакцынацыі ад каранавіруснай інфекцыі, у тым ліку дзяцей і падлеткаў, нашы лекары расказваюць на сустрэчах з калектывамі розных прадпрыемстваў, якія знаходзяцца на тэрыторыі раёна, — адзначыла Н. Дзяргач. - У чацвёртую хвалю пандэміі COVID-19 хварэлі і малыя, і дзеці старэйшыя, і падлеткі. Вельмі важна абараніць іх. Найлепшы, самы эфектыўны спосаб - гэта вакцынацыя. Асабліва з улікам таго, што ў Беларусь прыйшоў новы штам - «омікрон», які больш заразны, чым «дэльта». Мяркуючы з сітуацыі за мяжой, «омікрон» вельмі хутка распаўсюджваецца сярод насельніцтва.

- У Беларусі непаўналетніх планавалі прышчэпліваць расейскім «Спадарожнікам», адаптаваным пад дзяцей. А цяпер прапануюць «дарослую» кітайскую вакцыну Vero Cell карпарацыі Sinofarm ... Бацькі сумняваюцца, ці варта прышчапляць гэтым прэпаратам.

- Варта! Якія пытанні? У Кітаі прышчэпліваюць гэтай вакцынай дзяцей з 3 гадоў. Ніякіх праблем - вакцынацыю дзеці пераносяць добра, без пабочных эфектаў. Ад грыпу ж дзяцей і падлеткаў прышчэпліваем «дарослымі» вакцынамі! І ўсё выдатна!

- Грып - гэта адно, усе ўжо звыклі, прышчапляюцца, а каранавірусная інфекцыя - новая. Чаму тады расейскі «Спадарожнік» адаптавалі для дзяцей, у некалькі разоў зменшыўшы дозу прэпарата?

- Гэта розныя вакцыны. «Спадарожнік» зроблены паводле адной тэхналогіі, «Сінафарм» (так гэтую вакцыну называюць ва ўжытку. - Заўвага аўт.) - паводле іншай. Таму расейскую вакцыну трэба адаптаваць пад непаўналетніх, а кітайскую - не.

- Пераканалі. Дзе можна зрабіць прышчэпку ад COVID-19 дзіцяці?

- Толькі ва ўстанове аховы здароўя.

- Са згоды бацькоў?

- Так, з пісьмовай. Дарэчы, прышчапляем 12-17-гадовых. Магчыма, будзем вакцынаваць і ў больш раннім узросце. Але гэта ў перспектыве.