Данія скасавала ўсе антыкавідныя абмежаванні

Гэты крок Капенгаген абгрунтаваў высокай дзеллю прышчэпленых ад COVID-19.

Данія з аўторка, 1 лютага, касуе ўсе абмежаванні, што дзейнічалі ў краіне да гэтага дня, у барацьбе з пандэміяй каранавіруса, у тым ліку нашэнне ахоўных масак і абавязак паказваць сертыфікат аб вакцынацыі (так званы "пашпарт здароўя") для наведвання пэўных устаноў і мерапрыемстваў.

Толькі некаторыя меры, звязаныя з кантролем на ўездзе ў краіну, будуць дзейнічаць цягам бліжэйшых чатырох тыдняў, паведамляе dw.com.

На скасаванне абмежаванняў урад каралеўства пайшоў, нягледзячы на высокую колькасць заражэнняў у краіне. Са звестак партала Worldometer, які публікуе актуальную статыстыку колькасці інфікаванняў каранавірусам у свеце, з пачатку пандэміі ў Даніі, насельніцтва якой складае амаль 5,8 млн чалавек, вірус SARS-CoV-2 быў выяўлены ў 1 667 768 жыхароў.

Пры гэтым было зафіксавана 3 755 смяротных зыходаў у пацыентаў з пацверджаным дыягназам COVID-19. Перамагчы інфекцыю ўдалося 1 117 188 хворых.

Высокая дзель прышчэпленых ад COVID-19

Данія - першая краіна ў ЕЗ, якая пастанавіла скасаваць антыкавідныя абмежаванні на фоне шырокага распаўсюджвання ў свеце омікрон-варыянту SARS-CoV-2. Урад абгрунтаваў гэты крок высокай дзеллю вакцынаваных ад COVID-19 у краіне. Цалкам прышчэпленымі ад каранавіруса ў Даніі лічацца 81% насельніцтва. Гэта 4,72 млн. чалавек.