У САЗ заявілі пра шанцы ўзяць распаўсюджванне COVID-19 пад кантроль

Што для гэтага трэба зрабіць?

У Еўрапейскім рэгіёне ёсць шанец узяць пад кантроль распаўсюджванне каранавіруснай інфекцыі COVID-19. Пра гэта паведаміў дырэктар еўрапейскага бюро Сусветнай арганізацыі аховы здароўя Ханс Клюге на брыфінгу 3 лютага, паведаміла прэс-служба бюро.

Ён заявіў, што на мінулым тыдні ў Еўрапейскім рэгіёне было зарэгістравана 12 млн. новых выпадкаў COVID-19, што з'яўляецца самым высокім штотыднёвым паказчыкам захворвання з пачатку пандэміі. Са слоў Клюге, у значнай ступені ён абумоўлены штамам «Омікрон», які распаўсюджваецца з захаду на ўсход.

«Колькасць шпіталізацый працягвае расці, у асноўным у краінах з ніжэйшым ахопам вакцынацыяй уразлівых груп насельніцтва. Аднак гэты рост не такі хуткі, як узровень захворвання, і ў цэлым колькасць шпіталізацый у аддзяленні інтэнсіўнай тэрапіі значна не павялічылася. На гэты момант колькасць смерцяў у рэгіёне выходзіць на плато», - заявіў Клюге.

З ягоных слоў, у еўрапейскім рэгіёне САЗ «ёсць унікальная магчымасць» узяць распаўсюджванне віруса пад кантроль праз супадзенне трох элементаў: высокі ўзровень вакцынацыі і натуральны імунітэт да «Омікрона», «спрыяльная сезонная паўза па меры выхаду з зімы» і больш лёгкая плынь захворванні пры «Омікроне».

«Гэты кантэкст, якога мы дагэтуль не адчувалі ў гэтай пандэміі, пакідае нам магчымасць для працяглага перыяду спакою і значна больш высокага ўзроўню абароны насельніцтва ад любога аднаўлення перадачы, нават з больш небяспечным варыянтам», – заявіў Клюге.

Для гэтага, паводле слоў дырэктара бюро, трэба не спыняць кампаніі па вакцынацыі і рэвакцынацыі ад каранавіруса, «заахвочваць самаабаронныя паводзіны і асабістую адказнасць» і ўзмацніць эпіднагляд для выяўлення новых варыянтаў.

Клюге ўпэўнены, што на новыя варыянты каранавіруса, якія «непазбежна з'явяцца», можна будзе рэагаваць без увядзення строгіх мер, якія ўводзіліся раней. Ён таксама заклікаў забяспечыць усіх вакцынамі ад COVID-19.