Лекары: Смешна чытаць пра высокія тэхналогіі і інавацыі ў медыцыне

Аб праблемах у працы «хуткай» у ковідныя часы.

Пра праблемы на «хуткай» у ковідныя часы піша тэлеграм-канал «Белыя халаты»:

- Ёсць яшчэ адна праблема, якая тычыцца хуткай дапамогі і якая вельмі выразна выявілася падчас пандэміі. Праблема гэтая - кіслародныя маскі для нізкаплынявай аксігенатэрапіі, напрыклад, праз ВК-33 (кіслародны інгалятар). Такімі карыстаецца «хуткая» для транспартавання пацыентаў, якім патрабуецца кіслародная падтрымка. Колькасць такіх пацыентаў у каранавірусныя часы вельмі моцна ўзрасла.

Сутнасць праблемы з маскамі палягае ў тым, што большасць з іх аднаразовыя. Гэта проста напісана на пакаванні. Шматразовыя маюць на ўвазе хімічную стэрылізацыю, як правіла бязмала 8-20 раз у залежнасці ад вытворцы.

Але на «хуткіх» маскі закупляюцца і выдаюцца брыгадам раз на некалькі месяцаў. Колькасць таксама пакідае жадаць лепшага. Аднаразовыя маскі хутка сканчаюцца, а ў дастатковай колькасці застаюцца толькі анестэзіялагічныя маскі, бо апаратамі ШВЛ на «хуткай» карыстаюцца адзінкі.

Выкарыстоўваць іх з кіслародным інгалятарам немагчыма, бо пацыенту неабходна кудысьці выдыхаць, а маска прадугледжаная для падлучэння да дыхальнага контуру, які будзе выводзіць паветра, якое выдыхае пацыент праз клапан у масцы. Таму, калі выкарыстоўваць анестэзіялагічную маску, пацыент можа праз яе ўдыхнуць, але выдыхаць павінен, адымаючы маску ад твару.

Іншы варыянт выхаду, калі маскі для кіслародных інгалятараў на зыходзе - браць простую кіслародную маску і праціраць яе спіртам перад транспартаваннем кожнага наступнага пацыента. Пакінуць хворых без кіслароднага суправаджэння немагчыма, таму даводзіцца выкручвацца хаця б так.

Вытворца рэкамендуе «у выпадку неабходнасці паўторнага ўжывання цалкам пагрузіць пералічаныя вышэй матэрыялы ў ёмістасць са спіртам і закрыць вечкам. Час дэзінфекцыі не менш за 2 гадзіны. Дапускаецца выкарыстанне (замест спірту) антысептычных стрэптацыдзмяшчальных раствораў з павелічэннем часу дэзінфекцыі - не менш за дзень». Як захоўваць маскі пасля такой паўторнай стэрылізацыі - вытворца не паведамляе.

«Смешна і сумна чытаць пра ўсякія высокія тэхналогіі і інавацыі ў медыцыне, калі вось гэтае бязладдзе на кожным кроку. Веру, што ў Менску і ў абласных гарадах можа быць лепш, але ў раёнах гэта адбываецца на 100%», - кажуць медыкі.

Забеспячэнне брыгад хуткай дапамогі, роўна як і планаванне закупак расходнікаў, неабходных для працы - гэта тое, у чым адміністратары ад медыцыны за мінулыя два гады, здаецца, яшчэ ні разу не атрымалі поспеху.