Швэдскія інжынеры стварылі вялікі электрасамалёт
21- 16.12.2024, 14:50
- 5,138
Ён можа праляцець 200 км на адным паўгадзінным сілкаванні.
Швэдскі стартап Heart Aerospace рыхтуецца падняць у паветра прататып самага вялікага электрычнага самалёта. Выпрабаванні 30-мясцовага авіялайнера стартуюць у пачатку 2025 года.
У 2019 годзе стартап пачаў распрацоўку невялікага рэгіянальнага электрасамалёта. Распрацоўнікі планавалі стварыць самалёт на 19 пасажыраў з чатырма электрычнымі маторамі, піша «Еўрапульс».
Пазней праект змяніўся: кампанія надумала зрабіць самалёт на 30 месцаў пад назвай ES-30. З чатырох рухавікоў электрычнымі пакінулі толькі два, а два іншыя зрабілі звычайнымі, каб запускаць іх у далёкіх палётах.
Самалёт ES-30 з трыццаццю пасажырамі зможа ляцець 200 кіламетраў на электрычнасці. Каб гэта зрабіць, яму трэба будзе падсілкавацца цягам 30 хвілін. Калі выкарыстоўваць гібрыдны рэжым, далёкасць палёту павялічыцца да 400 кіламетраў. Калі зменшыць колькасць пасажыраў да 25, самалёт зможа праляцець да 800 кіламетраў. ES-30 зможа ўзлятаць з кароткіх узлётна-пасадачных палос даўжынёй да 1 100 метраў і будзе працаваць цішэй за звычайныя самалёты.
Прататып, які рыхтуюцца тэставаць у наступным годзе, атрымаў назву Heart X1. Ён лятае выключна на электрычнасці. Пазней Heart Aerospace збіраецца стварыць другі прататып самалёта, які будзе працаваць на двух розных тыпах рухавікоў. Выпрабаванні гэтага самалёта правядуць у 2026 годзе.
Гатовы самалёт збіраюцца запусціць у камерцыйнае выкарыстанне да 2029 года.
На дзель авіяцыйнага сектара прыпадае 13,9 адсотка выкідаў усяго транспарту ў ЕЗ, што робіць яго другой паводле велічыні крыніцай парніковых газаў пасля аўтамабільнага транспарту.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас [email protected]
